شرابی ڈرائیور دہشت گرد ہیں، :کرنول حادثہ میں ۲۰ مسافروں کی موت کے بعد حیدر آباد کے پولیس کمشنرکا بیان
کرنول بس حادثہ: چند منٹوں میں 20 مسافر زندہ جل کر ہلاک، آندھرا کے وزیر اعلیٰ چندرا بابو نائیڈو نے تحقیقات کے احکامات جاری کیے
آندھرا پردیش کے کرنول ضلع میں پیش آئے خوفناک بس حادثے کے بعد، حیدرآباد کے پولیس کمشنر وی سی سجنار نے سخت بیان دیتے ہوئے کہا کہ "شرابی ڈرائیور دہشت گرد ہیں” اور ان کے اعمال کو "سڑکوں پر دہشت گردی کے واقعات” قرار دیا۔
یہ حادثہ اُس وقت پیش آیا جب حیدرآباد سے بنگلورو جانے والی کاؤری ٹراویلز کی بس ایک موٹر سائیکل سے ٹکرا گئی، جس کے نتیجے میں بس میں آگ لگ گئی اور 20 مسافر زندہ جل کر ہلاک ہو گئے۔
پولیس تحقیقات کے مطابق حادثہ اُس وقت ہوا جب ایک نشے میں دھت بائیک سوار بس کے سامنے آگیا۔ بائیک سوار کی شناخت بی شیوا شنکر (21 سال) کے طور پر کی گئی ہے جو آندھرا کے تندراپادو گاؤں کا رہائشی تھا۔
سجنار نے اپنے ایک سوشل میڈیا پوسٹ (ایکس) میں لکھا:“شرابی ڈرائیور دہشت گرد ہیں۔ ان کے اعمال کسی دہشت گردی سے کم نہیں۔ کرنول بس حادثہ کوئی عام حادثہ نہیں بلکہ ایک قابلِ روک قتلِ عام تھا جو ایک غیر ذمہ دار اور شرابی بائیکر کے باعث پیش آیا۔ اس نے چند لمحوں میں کئی خاندانوں کو اجاڑ دیا۔”
انہوں نے مزید کہا:“میں اپنے بیان پر قائم ہوں کہ شرابی ڈرائیور دہشت گرد ہیں۔ وہ زندگیوں، خاندانوں اور مستقبل کو تباہ کرتے ہیں۔ ایسے مجرموں کے ساتھ ہرگز نرمی نہیں برتی جائے گی۔”
سجنار نے بتایا کہ حیدرآباد پولیس نشے میں گاڑی چلانے والوں کے خلاف زیرو ٹالرنس پالیسی پر عمل کر رہی ہے۔
انہوں نے کہا:
“جو کوئی بھی شراب کے نشے میں گاڑی چلاتا ہوا پکڑا گیا، اسے قانون کے مطابق سخت سزا دی جائے گی۔ اب وقت آگیا ہے کہ سماج نشے میں ڈرائیونگ کو ‘غلطی’ نہیں بلکہ ایک ‘جرم’ سمجھے۔”
حادثے کی تفصیلات
پہلے موصول ہونے والی اطلاعات کے برخلاف، پولیس تحقیقات میں پتہ چلا ہے کہ موٹر سائیکل حادثے کے وقت سڑک پر رکی ہوئی تھی۔ بس نے پیچھے سے آ کر ٹکر ماری، جس کے بعد بس میں آگ بھڑک اٹھی۔
قریبی پٹرول پمپ کی سی سی ٹی وی فوٹیج نے واقعے کی تفصیل واضح کی۔
فوٹیج کے مطابق:
2:22 بجے رات شیوا شنکر اپنے دوست ایری سوامی کے ساتھ پٹرول پمپ پر پہنچا۔
2:26 بجے دونوں نے وہاں سے روانگی کی۔
2:39 بجے کاؤری ٹراویلز کی بس اسی پٹرول پمپ کے قریب سے گزری۔
تقریباً 10 منٹ بعد (2:49 بجے) یہ المناک حادثہ چنہ ٹیکورو گاؤں کے قریب پیش آیا۔
حادثے کے بعد شیوا شنکر کی لاش سڑک کے ڈیوائیڈر پر ملی، جبکہ اس کا دوست زخمی حالت میں بچ گیا جس نے بعد میں پوری واردات کی تفصیلات بتائیں۔
آندھرا پردیش کے وزیر اعلیٰ این چندرا بابو نائیڈو نے اس حادثے پر گہرے رنج کا اظہار کرتے ہوئے اعلیٰ سطحی تحقیقات کے احکامات جاری کیے ہیں۔